رِسَالَةْ يَهُودَا
1
السّْلَامْ
1 أَنَا يَهُودَا الْعَبْدْ دْيَالْ يَسُوعْ الْمَسِيحْ، وْخُو يَعْقُوبْ، كَنْكْتَبْ لْهَادُوكْ اللِّي عَيّْطْ لِيهُمْ اللَّهْ الْآبْ وْكَيْبْغِيهُمْ، وْكَيْحْفَضْهُمْ لْيَسُوعْ الْمَسِيحْ، # متى 13:55؛ مرقس 6:3 2 اللَّهْ يْكَتّْرْ لِيكُمْ الرَّحْمَة وْالْهْنَا وْالْمْحَبَّة.
الْمُعَلِّمِينْ الْكْدَّابِينْ
3 آ خُوتِي الْعْزَازْ، كْنْتْ كَنْتّْمَنَّى نْكْتَبْ لِيكُمْ عْلَى الْمُوضُوعْ دْيَالْ النّْجَا اللِّي كَنْتّْشَارْكُو فِيهْ كُلّْنَا، وَلَكِنْ دَابَا بَانْ لِيَّ بْلِّي خَاصّْنِي نْكْتَبْ لِيكُمْ بَاشْ نْشَجّْعْكُمْ تْكَافْحُو عْلَى وْدّْ الْإِيمَانْ اللِّي عْطَاهْ اللَّهْ فْمَرَّة لْلْمُومْنِينْ دْيَالُه الْمْقَدّْسِينْ. 4 حِيتْ شِي نَاسْ فِيهُمْ الشَّرّْ تْسَلُّو فْوَسْطْكُمْ، وْرَاهُمْ كَيْحَوّْلُو النِّعْمَة دْيَالْ إِلَاهْنَا لْلْفْسَادْ، وْكَيْنَكْرُو السِّيّْدْ دْيَالْنَا الْوْحِيدْ، الرَّبّْ يَسُوعْ الْمَسِيحْ. هَادُو ݣَالْ عْلِيهُمْ الْكْتَابْ بْلِّي مْحْكُومْ عْلِيهُمْ مْنْ قْدِيمْ الزّْمَانْ.
5 وَاخَّا كَتْعَرْفُو هَادْشِّي، بْغِيتْ نْفَكّْرْكُمْ بْلِّي الرَّبّْ مْنْ بَعْدْمَا نْجَّا الشَّعْبْ دْيَالُه مْنْ أَرْضْ مِصْرْ، هْلَكْ اللِّي مَا آمْنُوشْ بِيهْ. 6 وْالْمَلَايْكَة اللِّي مَا تّْهَلَّاوْشْ فْالسُّلْطَة دْيَالْهُمْ وْسْمْحُو فْبْلَايْصْهُمْ، خْلَّاهُمْ الرَّبّْ مْرْبُوطِينْ دِيمَا بْالسّْنَاسْلْ فْالضّْلَامْ حْتَّى لْيُومْ الْحِسَابْ. 7 وْحْتَّى سَدُومْ وْعَمُورَة وْالْمْدُونْ اللِّي مْجَاوْرِينْهُمْ، وْاللِّي دَارُو الْفْسَادْ بْنَفْسْ الطَّرِيقَة، وْتْبْعُو طْبِيعَة خْرَى، رَاهُمْ تْعَدّْبُو بْالنَّارْ الدَّايْمَة وْوْلَّاوْ مْتَالْ لْوْحْدِينْ خْرِينْ. 8 وْرَاهْ هَادْشِّي اللِّي كَيْدِيرُو حْتَّى هَادْ النَّاسْ اللِّي كَيْتّْخَيّْلُو شِي حْوَايْجْ مَا كَايْنَاشْ، كَيْنَجّْسُو الدَّاتْ دْيَالْهُمْ، وْكَيْحْتَقْرُو سُلْطَةْ اللَّهْ، وْكَيْسَبُّو الْمَلَايْكَة دْ الْعَزّْ. 9 وْرَاهْ مِيخَائِيلْ رَئِيسْ الْمَلَايْكَة مْلِّي تّْخَاصْمْ مْعَ إِبْلِيسْ وْتّْنَاقْشْ مْعَاهْ عْلَى الدَّاتْ دْيَالْ مُوسَى، مَا بْغَاشْ يْحْكَمْ عْلِيهْ وْيْݣُولْ فْحَقُّه كْلَامْ خَايْبْ وَلَكِنْ ݣَالْ لِيهْ: «الرَّبّْ غَيْعَاقْبْكْ!». 10 وَلَكِنْ هَادْ النَّاسْ كَيْسَبُّو أَيّْ حَاجَة مَا عَارْفِينْهَاشْ، وْدَاكْشِّي اللِّي كَيْفَهْمُوهْ بْالطّْبِيعَة دْيَالْهُمْ اللِّي بْحَالْ وْحُوشْ الْغَابَة هُوَ بْنَفْسُه اللِّي كَيْتْسَبّْبْ لِيهُمْ فْالْهْلَاكْ. 11 يَا وِيلْ هَادْ النَّاسْ! عْلَاحْقَّاشْ تْبْعُو طْرِيقْ قَايِينْ، وْمْشَاوْ فْالْغَلَطْ بْحَالْ بَلْعَامْ عْلَى وْدّْ الْفْلُوسْ، وْتَارُو كِمَا تَارْ قُورَحْ وْتّْهَلْكُو. 12 رَاهْ هَادُو خَطَرْ عْلِيكُمْ فْالْحَفَلَاتْ دْيَالْ الْمْحَبَّة، كَيْشَارْكُوكُمْ فِيهُمْ بْلَا حْشْمَة، وْكَيْعَمّْرُو كْرُوشْهُمْ. هُمَ بْحَالْ الْغْيَامْ بْلَا شْتَا وْدَافْعَاهْ الرِّيحْ. وْبْحَالْ شْجَرْ الْخْرِيفْ بْلَا غْلَّة، مْقَلّْعْ مْنْ جْدُورُه وْمْيّْتْ جُوجْ مْرَّاتْ. 13 هُمَ بْحَالْ مَّاجْ الْبْحَرْ الْهَايْجَة اللِّي كَتْرْمِي الرّْغْوَة دْيَالْهَا، وْالنّْجُومْ الْمُّوضّْرَة اللِّي غَيْبْقَاوْ عْلَى الدّْوَامْ فْوَسْطْ الضّْلَامْ الْقْوِي. 14 وْحْتَّى أَخْنُوخْ اللِّي هُوَ الْجِيلْ السَّابْعْ مْنْ آدَمْ تّْنَبّْأْ عْلِيهُمْ وْݣَالْ: «هَا هُوَ الرَّبّْ جَا مْعَ الْمَلَايِينْ دْ الْمْقَدّْسِينْ دْيَالُه! 15 بَاشْ يْحْكَمْ عْلَى ݣَاعْ النَّاسْ، وْيْعَاقْبْ ݣَاعْ الْمْشْرَارِينْ عْلَى وْدّْ ݣَاعْ فْعَايْلْ الشَّرّْ اللِّي دَارُوهَا، وْعْلَى وْدّْ كُلّْ كْلْمَة دْ الْكُفْرْ ݣَالُوهَا فْحَقُّه هَادْ النَّاسْ الْمُدْنِبِينْ اللِّي مَا كَيْآمْنُوشْ». 16 هَادُو كَيْݣَمْݣْمُو وْكَيْتّْشْكَّاوْ، وْكَيْتْبْعُو الشَّهْوَة دْيَالْهُمْ، وْكَيْهَضْرُو بْالْكِبْرْ، وْكَيْضَحْكُو فْوْجَهْ النَّاسْ عْلَى وْدّْ مْصْلَحْتْهُمْ.
كِيفَاشْ خَاصّْ الْمَسِيحِيِّينْ يْعِيشُو
17 وَلَكِنْ نْتُمَ آ الْخُوتْ الْعْزَازْ، تْفَكّْرُو الْكْلَامْ اللِّي ݣَالُوهْ لِيكُمْ مْنْ قْبَلْ الرُّسُلْ دْيَالْ رَبّْنَا يَسُوعْ الْمَسِيحْ. 18 مْلِّي ݣَالُو لِيكُمْ: «رَاهْ فْاللّْخْرْ دْيَالْ الزّْمَانْ غَادِي يْجِيوْ شِي وْحْدِينْ كَيْضَحْكُو عْلَى النَّاسْ وْتَابْعِينْ شَهْوَةْ الشَّرّْ دْيَالْهُمْ». # 2بطرس 3:3 19 هَادُو هُمَ اللِّي كَيْتّْسَبّْبُو فْالتَّفْرِقَة دْيَالْ النَّاسْ، وْالشَّهْوَة دْيَالْ الدَّاتْ دْيَالْهُمْ هِيَ اللِّي كَتّْحَكّْمْ فِيهُمْ، وْمَا فِيهُمْشْ رُوحْ اللَّهْ. 20 وَلَكِنْ نْتُمَ آ الْخُوتْ الْعْزَازْ، قْوِّيوْ حْيَاتْكُمْ فْإِيمَانْكُمْ الْمْقَدّْسْ، وْصَلِّيوْ فْالرُّوحْ الْقُدُسْ. 21 تْبْتُو فْمْحَبَّةْ اللَّهْ، وْنْتُمَ كَتّْسْنَّاوْ رَحْمَةْ رَبّْنَا يَسُوعْ الْمَسِيحْ بَاشْ يْعْطِيكُمْ الْحَيَاةْ الدَّايْمَة. 22 وْحْنُّو عْلَى اللِّي كَيْشَكُّو. 23 وْعْتْقُو وْحْدِينْ خْرِينْ، وْبَعّْدُوهُمْ مْنْ الْعَافْيَة، وْحْنُّو عْلَى وْحْدِينْ خْرِينْ وْرَدُّو بَالْكُمْ مْنّْهُمْ، وْكْرْهُو حْتَّى اللّْبَاسْ اللِّي نَجّْسُوهْ بْدَاتْهُمْ.
يَهُودَا كَيْعْطِي الْعَزّْ لْلَّهْ
24 وْلْلَّهْ اللِّي قَادْرْ يْحْضِيكُمْ بَاشْ مَا تْطِيحُوشْ، وْيْوَقَفّْكُمْ قُدَّامْ الْعَزّْ دْيَالُه بْلَا عِيبْ وْفْرْحَانِينْ. 25 لْلْإِلَاهْ الْوَاحْدْ، مُنَجِّينَا بْيَسُوعْ الْمَسِيحْ رَبّْنَا، يْكُونْ الْعَزّْ، وْالْجَلَالْ، وْالْقُوَّة، وْالسُّلْطَة، قْبَلْ مْنْ الزّْمَانْ وْدَابَا وْعْلَى الدّْوَامْ. آمِينْ.
الترجمة المغربية القياسية (MSTD)
الترجمة المغربية القياسية هي ترجمة للكتاب المقدس إلى الدارجة المغربية، تمت ترجمة العهد الجديد ونشره سنة 2012 من طرف دار الكتاب المقدس بالمغرب. وتنكب دار الكتاب المقدس حاليا على إتمام ترجمة العهد القديم (التوراة، الزبور واﻷنبياء) إلى الدارجة المغربية، ومن المتوقع أن يتم نشر كل أسفار الكتاب المقدس بالدارجة المغربية مع منتصف سنة 2021. إذا كنت تريد الحصول على نسخة مطبوعة أو مسموعة من اﻹنجيل، أو لديك استفسار أو تعليقات، الرجاء الاتصال بنا من خلال موقعنا اﻹلكتروني www.biblesociety.ma
