رِسَالَةْ يُوحَنَّا التَّانِيَّة
1
السّْلَامْ
1 مْنْ يُوحَنَّا الْمْسْؤُولْ الْكْبِيرْ دْيَالْ الْكْنِيسَة، لْلسَّيّْدَة اللِّي خْتَارْهَا اللَّهْ، وْلْوْلَادْهَا اللِّي كَنْبْغِيهُمْ فْالْحَقّْ، مَاشِي غِيرْ أَنَا بُوحْدِي، وَلَكِنْ حْتَّى اللِّي كَيْعَرْفُو الْحَقّْ كُلّْهُمْ. 2 عْلَى وْدّْ الْحَقّْ اللِّي تَابْتْ فِينَا وْغَيْبْقَى مْعَانَا عْلَى الدّْوَامْ: 3 كَنْطْلَبْ مْنْ اللَّهْ الْآبْ، وْمْنْ يَسُوعْ الْمَسِيحْ اللِّي هُوَ وَلْدْ الْآبْ، يْعْطِيوْنَا النِّعْمَة وْالرَّحْمَة وْالْهْنَا فْالْحَقّْ وْالْمْحَبَّة.
عِيشُو فْالْحَقّْ وْالْمْحَبَّة
4 رَانِي فْرَحْتْ بْزَّافْ مْلِّي لْقِيتْ شِي وْحْدِينْ مْنْ وْلَادْكْ كَيْعِيشُو فْالْحَقّْ كِمَا وْصَّانَا الْآبْ. 5 وْدَابَا كَنْطْلَبْ مْنّْكْ آ لَالَّة، بْلِّي خَاصّْنَا نْبْغِيوْ بْعْضِيَّاتْنَا، مَاشِي بْحَالْ إِلَا كَنْكْتَبْ لِيكْ شِي وْصِيَّة جْدِيدَة، وَلَكِنْ وْصِيَّة اللِّي كَانْتْ عَنْدْنَا مْنْ اللّْوّْلْ. # يوحنا 13:34؛ 15:12،17 6 رَاهْ الْمْحَبَّة هِيَ نْعِيشُو عْلَى حْسَابْ الْوْصِيَّاتْ دْيَالْ اللَّهْ، وْالْوْصِيَّة اللِّي سْمَعْتُوهَا مْنْ اللّْوّْلْ هِيَ تْعِيشُو فْالْمْحَبَّة.
7 عْلَاحْقَّاشْ كْتْرُو فْهَادْ الدّْنْيَا اللِّي كَيْعَلّْمُو الْكْدُوبْ، وْمَا كَيْعْتَرْفُوشْ بْلِّي يَسُوعْ الْمَسِيحْ جَا فْصِفْةْ بْنَادْمْ. هَادَا هُوَ الْكْدَّابْ، وْالْعْدُو دْيَالْ الْمَسِيحْ. 8 رْدُّو بَالْكُمْ بَاشْ مَا تْضِيعْشْ تَمَارَة اللِّي ضْرَبْنَاهَا عْلَى وْدّْكُمْ، وَلَكِنْ بَاشْ تَاخْدُو الْأَجْرْ دْيَالْكُمْ كَامْلْ. 9 اللِّي خْرَجْ مْنْ التَّعْلِيمْ دْيَالْ الْمَسِيحْ وْمَا تْبَتْشْ فِيهْ، رَاهْ مَا عَنْدُوشْ اللَّهْ. وْاللِّي تْبَتْ فْالتَّعْلِيمْ دْيَالْ الْمَسِيحْ رَاهْ عَنْدُه الْآبْ وْعَنْدُه حْتَّى الْوَلْدْ. 10 إِلَا جَاكُمْ شِي وَاحْدْ بْتَعْلِيمْ آخُرْ مْنْ غِيرْ هَادْ التَّعْلِيمْ، مَا تْقْبْلُوهْشْ فْدَارْكُمْ وْمَا تْسَلّْمُوشْ عْلِيهْ. 11 حِيتْ اللِّي سَلّْمْ عْلِيهْ، كَيْشَارْكْ مْعَاهْ فْأَعْمَالْ الشَّرّْ.
12 رَاهْ عَنْدِي بْزَّافْ دْ الْأُمُورْ مَا نْكْتَبْ لِيكُمْ، وَلَكِنْ مَا بْغِيتْشْ نْدِيرْ هَادْشِّي بْالْوَرْقَة وْالْمْدَادْ، وْكَنْتّْمَنَّى نْجِي لْعَنْدْكُمْ وْنْتّْكَلّْمْ مْعَاكُمْ وْجَهْ لْوْجَهْ، بَاشْ تْكْمَلْ الْفَرْحَة دْيَالْنَا. 13 كَيْسَلّْمُو عْلِيكْ وْلَادْ خْتْكْ اللِّي خْتَارْهَا اللَّهْ.
الترجمة المغربية القياسية (MSTD)
الترجمة المغربية القياسية هي ترجمة للكتاب المقدس إلى الدارجة المغربية، تمت ترجمة العهد الجديد ونشره سنة 2012 من طرف دار الكتاب المقدس بالمغرب. وتنكب دار الكتاب المقدس حاليا على إتمام ترجمة العهد القديم (التوراة، الزبور واﻷنبياء) إلى الدارجة المغربية، ومن المتوقع أن يتم نشر كل أسفار الكتاب المقدس بالدارجة المغربية مع منتصف سنة 2021. إذا كنت تريد الحصول على نسخة مطبوعة أو مسموعة من اﻹنجيل، أو لديك استفسار أو تعليقات، الرجاء الاتصال بنا من خلال موقعنا اﻹلكتروني www.biblesociety.ma
