رِسَالَةْ بُولُسْ اللّْوّْلَى لْأَهْلْ تْسَالُونِيكِي
الْفَصْلْ اللّْوّْلْ
1
السّْلَامْ
1 مْنْ بُولُسْ وْسِلْوَانُسْ وْتِيمُوتَاوُسْ، لْلْمُومْنِينْ دْيَاوْلْ كْنِيسْةْ تْسَالُونِيكِي، اللِّي هُمَ دْيَالْ اللَّهْ الْآبْ وْالرَّبّْ يَسُوعْ الْمَسِيحْ: النِّعْمَة وْالْهْنَا لِيكُمْ. # الاعمال 17:1
بُولُسْ كَيْشْكَرْ اللَّهْ عْلَى الْمُومْنِينْ دْيَالْ تْسَالُونِيكِي
2 دِيمَا كَنْشَكْرُو اللَّهْ مْنْ جِهْتْكُمْ كُلّْكُمْ، وْكَنْتّْفَكّْرُوكُمْ فْصْلَاتْنَا. 3 وْكَنْتّْفَكّْرُو قُدَّامْ اللَّهْ بَّانَا الْخْدْمَة دْ إِيمَانْكُمْ، وْالْكِفَاحْ دْ مْحَبّْتْكُمْ، وْكِيفَاشْ نْتُمَ تَابْتِينْ فْالرّْجَا اللِّي عَنْدْكُمْ فْرَبّْنَا يَسُوعْ الْمَسِيحْ. 4 وْرَاهْ حْنَا عَارْفِينْ آ الْخُوتْ الْعْزَازْ عَنْدْ اللَّهْ، بْلِّي اللَّهْ خْتَارْكُمْ، 5 عْلَاحْقَّاشْ الْإِنْجِيلْ اللِّي خَبّْرْنَاكُمْ بِيهْ مَا كَانْشْ غِيرْ بْالْهَضْرَة، وَلَكِنْ كَانْ بْالدَّلِيلْ الْقْوِي وْبْالرُّوحْ الْقُدُسْ، وْحْنَا مْتْيِقّْنِينْ مْنُّه، وْنْتُمَ كَتْعَرْفُو كِيفَاشْ كْنَّا مْعَاكُمْ عْلَى وْدّْ مْصْلَحْتْكُمْ. 6 وْرَاكُمْ تْعَلّْمْتُو تْعِيشُو بْحَالْنَا وْبْحَالْ الرَّبّْ، مْلِّي قْبَلْتُو كْلَامْ اللَّهْ فْوَسْطْ الْمْحْنَة الْكْبِيرَة بْالْفَرْحَة اللِّي عْطَاهَا لِيكُمْ الرُّوحْ الْقُدُسْ. # الاعمال 17:5-9 7 وْهَكَّا وْلِّيتُو مْتَالْ لْݣَاعْ هَادُوكْ اللِّي كَيْآمْنُو فْمَكِدُونِيَة وْفْأَخَائِيَة. 8 حِيتْ مْنْ عَنْدْكُمْ دَاعْ كْلَامْ الرَّبّْ، مَاشِي غِيرْ فْمَكِدُونِيَة وْأَخَائِيَة، وَلَكِنْ خْبَارْ إِيمَانْكُمْ بْاللَّهْ دَاعْ فْكُلّْ بْلَاصَة حْتَّى مَا بْقَى لِينَا مَا نْݣُولُو. 9 عْلَاحْقَّاشْ ݣَاعْ النَّاسْ كَيْعَاوْدُو عْلَى كِيفَاشْ رَحّْبْتُو بِينَا مْلِّي كْنَّا عَنْدْكُمْ، وْكِيفَاشْ رْجَعْتُو لْطْرِيقْ اللَّهْ وْمَا بْقِيتُوشْ كَتْعَبْدُو الْأَصْنَامْ، بَاشْ تْخَدْمُو لْلَّهْ الْحَيّْ وْالْحْقِيقِي. 10 وْبَاشْ تّْسْنَّاوْ مْنْ السَّمَاوَاتْ الْمْجِي دْ الْوَلْدْ دْيَالُه، اللِّي بَعْتُه مْنْ بِينْ الْمُوتَى، يَسُوعْ اللِّي كَيْنَجِّينَا مْنْ الْغَضَبْ اللِّي جَايْ دْيَالْ اللَّهْ.
الترجمة المغربية القياسية (MSTD)
الترجمة المغربية القياسية هي ترجمة للكتاب المقدس إلى الدارجة المغربية، تمت ترجمة العهد الجديد ونشره سنة 2012 من طرف دار الكتاب المقدس بالمغرب. وتنكب دار الكتاب المقدس حاليا على إتمام ترجمة العهد القديم (التوراة، الزبور واﻷنبياء) إلى الدارجة المغربية، ومن المتوقع أن يتم نشر كل أسفار الكتاب المقدس بالدارجة المغربية مع منتصف سنة 2021. إذا كنت تريد الحصول على نسخة مطبوعة أو مسموعة من اﻹنجيل، أو لديك استفسار أو تعليقات، الرجاء الاتصال بنا من خلال موقعنا اﻹلكتروني www.biblesociety.ma
