الرُّؤْيَا دْيَالْ يُوحَنَّا
الْفَصْلْ اللّْوّْلْ
1
1 هَادِي هِيَ الرُّؤْيَا اللِّي عْطَاهَا اللَّهْ لْيَسُوعْ الْمَسِيحْ بَاشْ يْبَيّْنْ لْلْعْبِيدْ دْيَالُه دَاكْشِّي اللِّي لَابْدّْ مَا يْجْرَا فْوَقْتْ قْرِيبْ. وْصِيفْطْ الْمَلَاكْ دْيَالُه بَاشْ يْبَيّْنْهَا لْلْعَبْدْ دْيَالُه يُوحَنَّا. 2 اللِّي شْهَدْ بْلِّي ݣَاعْ دَاكْشِّي اللِّي شَافْ هُوَ كْلَامْ اللَّهْ، وْهُوَ الشّْهَادَة دْيَالْ يَسُوعْ الْمَسِيحْ. 3 سْعْدَاتْ اللِّي كَيْقْرَا الْكْلَامْ دْيَالْ هَادْ النُّبُوَّة، وْسْعْدَاتْ اللِّي كَيْسَمْعُو، وْكَيْدِيرُو بْدَاكْشِّي اللِّي مْكْتُوبْ فِيهَا، حِيتْ الْوَقْتْ قَرّْبْ.
يُوحَنَّا كَيْكْتَبْ لْلْكْنَايْسْ السّْبْعَة اللِّي فْبْلَادْ آسْيَا
4 مْنْ يُوحَنَّا، لْلْكْنَايْسْ السّْبْعَة اللِّي فْبْلَادْ آسْيَا: النِّعْمَة وْالْهْنَا مْنْ اللَّهْ اللِّي كَايْنْ وْاللِّي كَانْ وْاللِّي غَيْجِي، وْمْنْ الْأَرْوَاحْ السّْبْعَة اللِّي قُدَّامْ الْعَرْشْ دْيَالُه، # الرؤيا 4:5 5 وْمْنْ يَسُوعْ الْمَسِيحْ الشَّاهْدْ الْأَمِينْ، اللّْوّْلْ اللِّي تّْبْعَتْ مْنْ بِينْ الْمُوتَى، وْرَئِيسْ مُلُوكْ الْأَرْضْ.
لْهَادَاكْ اللِّي كَيْبْغِينَا، وْبْدْمُّه حَرّْرْنَا مْنْ دْنُوبْنَا، 6 وْدَارْ مْنَّا مَمْلَكَةْ وْرْجَالْ الدِّينْ لْلَّهْ بَّاهْ، لِيهْ الْعَزّْ وْالْقُدْرَة عْلَى الدّْوَامْ. آمِينْ. # الرؤيا 5:10
7 هَا هُوَ جَايْ فْالسّْحَابْ، # متى 24:30؛ مرقس 13:26؛ لوقا 21:27؛ 1تسالونيكي 4:17؛ يوحنا 19:34،37؛ متى 24:30
وْغَتْشُوفُه كُلّْ عِينْ،
حْتَّى هَادُوكْ اللِّي ضْرْبُوهْ،
وْݣَاعْ قْبَايْلْ الْأَرْضْ غَيْنَدْبُو عْلِيهْ.
إِيِّهْ! هَادْشِّي غَيْكُونْ. آمِينْ!
8 كَيْݣُولْ الرَّبّْ الْإِلَاهْ اللِّي كَايْنْ، وْاللِّي كَانْ، وْاللِّي غَيْجِي، وْالْقَادْرْ عْلَى كُلّْشِي: «أَنَا هُوَ الْأَلِفْ وْالْيَاءْ».
يُوحَنَّا كَيْتّْكَلّْمْ عْلَى الرُّؤْيَا دْيَالُه
9 أَنَا يُوحَنَّا خُوكُمْ وْشْرِيكْكُمْ فْالْمْحْنَة، وْفْمَمْلَكَةْ اللَّهْ، وْفْالصّْبَرْ فْيَسُوعْ. كْنْتْ مْنْفِي فْالْجَزِيرَة اللِّي كَتّْسْمَّى بَطْمُسْ بْسْبَابْ كْلَامْ اللَّهْ وْالشّْهَادَة لْيَسُوعْ. 10 وْفْنْهَارْ الرَّبّْ، نْزَلْ عْلِيَّ رُوحْ اللَّهْ، وْسْمَعْتْ مْنْ وْرَايَ وَاحْدْ الصُّوتْ قْوِي بْحَالْ صُوتْ الْبُوقْ 11 كَيْݣُولْ: «كْتَبْ دَاكْشِّي اللِّي كَتْشُوفُه فْكْتَابْ وْصِيفْطُه لْلْكْنَايْسْ السّْبْعَة: أَفَسُسْ، وْسِمِيرْنَا، وْبَرْغَامُسْ، وْتِيَاتِيرَا، وْسَارْدِسْ، وْفِيلَادِلْفِيَا، وْلَاوُدِكِيَّة».
12 وْتْلَفّْتّْ بَاشْ نْشُوفْ شْكُونْ اللِّي تّْكَلّْمْ مْعَايَ. وْمْلِّي تْلَفّْتْ بَانُو لِيَّ سْبْعَة دْ الْحَسْكَاتْ دْيَالْ الدّْهَبْ. 13 وْفْوَسْطْ الْحَسْكَاتْ وَاحْدْ كَيْشْبَهْ لْوَلْدْ الْإِنْسَانْ، لَابْسْ لْبَاسْ طْوِيلْ حْتَّى لْرْجْلِيهْ، وْمْحَزّْمْ صَدْرُه بْحْزَامْ دْيَالْ الدّْهَبْ. 14 وْالشّْعَرْ دْيَالْ رَاسُه بْيَضْ بْحَالْ الصُّوفَة، وْبْحَالْ التّْلْجْ، وْعِينِيهْ بْحَالْ الشّْعَالَة دْ الْعَافْيَة. 15 وْرْجْلِيهْ بْحَالْ النّْحَاسْ الْمْصْقُولْ فْزُوبْيَة دْ الْعَافْيَة. وْصُوتُه بْحَالْ صُوتْ الْمَا دْيَالْ الشّْلَّالَاتْ. 16 وْفْيْدُّه لِيمْنَى سْبْعَة دْ النّْجْمَاتْ، وْمْنْ فُمُّه خَارْجْ سِيفْ مَاضِي مْنْ جُوجْ جْوَايْهْ، وْوْجْهُه كَيْلْمَعْ بْحَالْ الشّْمْسْ مْلِّي كَتْضَوِّي فْوَسْطْ النّْهَارْ. 17 وْمْلِّي شْفْتُه طْحْتْ عَنْدْ رْجْلِيهْ بْحَالْ الْمْيّْتْ، وْهُوَ يْحَطّْ عْلِيَّ يْدُّه لِيمْنَى وْݣَالْ: «مَا تْخَافْشْ، أَنَا هُوَ اللّْوّْلْ وْاللّْخْرْ، # إشعيا 48:12؛ الرؤيا 2:8؛ 22:13 18 وْالْحَيّْ. كْنْتْ مْيّْتْ وَلَكِنْ دَابَا هَانِي حَيّْ دِيمَا وْعْلَى الدّْوَامْ، وْعَنْدِي سْوَارْتْ الْمُوتْ وْالْهَاوِيَة. 19 إِيوَا كْتَبْ دَاكْشِّي اللِّي شْفْتِيهْ، وْدَاكْشِّي اللِّي كَيْجْرَا دَابَا، وْدَاكْشِّي اللِّي غَيْجْرَا مْنْ بَعْدْ هَادْ الْأُمُورْ. 20 رَاهْ السِّرّْ دْيَالْ النّْجْمَاتْ السّْبْعَة اللِّي شْفْتِي فْيْدِّي لِيمْنَى، وْالْحَسْكَاتْ السّْبْعَة دْيَالْ الدّْهَبْ هُوَ هَادَا: النّْجْمَاتْ السّْبْعَة هُمَ الْمَلَايْكَة دْيَالْ الْكْنَايْسْ السّْبْعَة، وْالْحَسْكَاتْ السّْبْعَة هُمَ الْكْنَايْسْ السّْبْعَة».
الترجمة المغربية القياسية (MSTD)
الترجمة المغربية القياسية هي ترجمة للكتاب المقدس إلى الدارجة المغربية، تمت ترجمة العهد الجديد ونشره سنة 2012 من طرف دار الكتاب المقدس بالمغرب. وتنكب دار الكتاب المقدس حاليا على إتمام ترجمة العهد القديم (التوراة، الزبور واﻷنبياء) إلى الدارجة المغربية، ومن المتوقع أن يتم نشر كل أسفار الكتاب المقدس بالدارجة المغربية مع منتصف سنة 2021. إذا كنت تريد الحصول على نسخة مطبوعة أو مسموعة من اﻹنجيل، أو لديك استفسار أو تعليقات، الرجاء الاتصال بنا من خلال موقعنا اﻹلكتروني www.biblesociety.ma
